Inspektorati Policor i Kosovës ka rekomanduar suspendimin me pagesë të një zyrtari policor që shërben në Stacionin Policor Kufitar në Aeroportin Ndërkombëtar të Prishtinës “Adem Jashari”.

Sipas një komunikate për media të IPK-së, institucioni ka pranuar më 14 shtator një rast të referuar nga Policia e Kosovës, “lidhur me dyshimin për kryerjen e veprimeve të kundërligjshme nga një zyrtar policor me detyrë Stacionin Policor Kufitar në Aeroportin Ndërkombëtar të Prishtinës ‘Adem Jashari’”.

“Sipas informatave fillestare të siguruara gjatë hetimit, më 9 shtator 2026, një punonjës i aeroportit kishte raportuar humbjen e një shume parash (105 eurosh)”, thuhet në komunikatë.

-Advertisement-

IPK ka bërë të ditur se, gjatë veprimeve hetimore dhe shqyrtimit të pamjeve nga kamerat e sigurisë, është konstatuar se paratë ishin gjetur nga një udhëtare, shtetase e Kosovës me banim në Gjermani, e cila më pas ia kishte dorëzuar ato një zyrtari policor.

“Pas pranimit të rastit, IPK ka ndërmarrë veprimet e nevojshme hetimore për sigurimin dhe administrimin e informatave dhe provave fillestare”, thuhet në komunikatë.

“Bazuar në shkresat e pranuar për këtë rast, zyrtari policor ka pranuar se kishte marrë paratë, por ato nuk i kishte dorëzuar dhe trajtuar në pajtim me procedurat ligjore dhe institucionale të parapara për raste të tilla”, njofton IPK.

Sipas shkresave të përmendura nga IPK-ja, zyrtari policor më vonë i kishte vendosur paratë në kutinë e donacioneve të një organizate bamirëse në Aeroport.

“Duke vlerësuar ekzistimin e dyshimit të arsyeshëm dhe me qëllim të sigurimit të kushteve të nevojshme për zhvillimin e papenguar të hetimeve, IPK i ka rekomanduar Policisë së Kosovës suspendimin me pagesë të zyrtarit policor”, thuhet në komunikatë.

IPK ka bërë të ditur se hetimet po vazhdojnë në drejtim të veprave penale “Përvetësimi në Detyrë” dhe “Shpërdorimi i pasurisë së huaj”.

“Hetuesit e IPK-së në koordinim të plotë me Prokurorinë do të vazhdojnë të ndërmarrin edhe veprime të tjera hetimore drejt ndriçimit të plotë të të gjitha rrethanave që ndërlidhen me këtë rast”, thuhet në komunikatë.

Udhëto Oslo – Prishtinë çdo javë me PrishtinaTickets

Sponsoruar

-Advertisement-