Lajme

EFJ: Liria e medias në Kosovë ka shënuar përkeqësim

Autori: Gazeta inFokus 11:03 | 20 July 2026

Federata Evropiane e Gazetarëve (EFJ), të hënën, ka publikuar raportin për lirin e medias në Kosovë, pas një vizite dyditore në Prishtinë.

Në raport theksohet se ndonëse Kosova ka një peizazh mediatik pluralist, nivele të ulëta të dhunës fizike ndaj gazetarëve dhe një kuadër ligjor kryesisht të harmonizuar me standardet evropiane dhe ndërkombëtare, liria e medias ka pësuar një rënie të qartë.

“Miratimi nga Kuvendi i një ligji për mediat – i cili më pas u shpall antikushtetues – dhe që do të rriste kontrollin politik mbi Komisionin e Pavarur të Mediave (KPM), financimi i pamjaftueshëm dhe presionet ndaj Radio Televizionit të Kosovës (RTK), si dhe shtimi i vazhdueshëm i sulmeve verbale dhe denigrimit të gazetarëve nga politikanët e partisë në pushtet, përmenden si faktorët kryesorë që kanë ndikuar në këtë vlerësim”, thuhet në raport.

-Advertisement-

Disa standarde të lirisë së mediave, sipas raportit, janë cenuar nga partia në pushtet, Lëvizja Vetëvendosje.

“Si rezultat, nga një nivel i qëndrueshëm i lirisë së mediave në një vend që aspiron anëtarësimin në Bashkimin Evropian vendi ka kaluar në një periudhë përkeqësimi gjatë tri viteve të fundit, e nxitur kryesisht nga faktorë politikë”.

Në raport ndër të tjera theksohet se Kosova është renditur në vendin e 84-të nga 180 shtete në Indeksin Botëror të Lirisë së Mediave të RSF-së për vitin 2026, duke shënuar rënie për 28 vende që nga viti 2023.

“Këto zhvillime e kanë cenuar trajektoren e mëparshme pozitive të Kosovës për lirinë e shtypit dhe zhvillimin e mediave që nga pavarësia e vendit në vitin 2008. Kjo e ka dëmtuar statusin e saj si një lider rajonal për lirinë e mediave në procesin e anëtarësimit në BE dhe prandaj nevojitet vullnet i vazhdueshëm politik për adresimin e kësaj situate”.

Një faktor kryesor që ka ndikuar në këtë raport, sipas EFJ-së, konkluzionet e organizatave pjesëmarrëse në mision është përkeqësimi i klimës për sigurinë e gazetarëve në Kosovë, veçanërisht për shkak të rritjes së nivelit të denigrimit verbal dhe stigmatizimit të profesionistëve të mediave nga politikanë të nivelit të lartë, shpesh nga radhët e partisë në pushtet, gjë që po ka ndikim toksik si në diskursin publik, ashtu edhe në sigurinë e profesionit.

Një shqetësim tjetër kyç, sipas raportit, lidhet me çështjet ende të pazgjidhura sa i përket financimit dhe pavarësisë së transmetuesit publik RTK, si dhe me akuzat për presione politike ndaj transmetuesit

Një çështje e tretë thelbësore, sipas raportit, mbetet pavarësia e Komisionit të Pavarur të Mediave (KPM).

Një ligj i kontestuar për KPM-në, i miratuar nga Kuvendi në qershor të vitit 2024, u shfuqizua pasi u shpall antikushtetues nga Gjykata Kushtetuese e Kosovës në prill të vitit 2025. Delegacioni vlerëson se ndryshimi legjislativ do të kishte mundësuar kapjen e mundshme politike të rregullatorit të mediave në Kosovë.

Teknologjia në kuzhinë nuk është vetëm çështje komoditeti, por edhe kohe: Njihuni me pllakën inovative me induksion Miele KM 8000!
-Advertisement-

T� tjera

Ky website përdor cookies. Duke vazhduar përdorimin, ju pranoni përdorimin e tyre.

Privacy policy