Në sytë e një votuesi të Kosovës, fotografia që do të shfaqet nesër në sallën e Kuvendit është një përzierje absurde dhe groteske mes komedisë dhe tragjedisë politike. Një Edi Rama i gjatë, i buzëqeshur dhe me arrogancën e një artisti që pikturon në një kanavacë të huaj, qëndron pranë Albin Kurtit të heshtur, i cili ndoshta për herë të parë në karrierën e tij politike ka hequr dorë nga roli i rebelit për t’u bërë një figurë kombëtare… të paktën në fotografi. Si dy aktorë në një skenë të sajuar, ata i shtrijnë duart njëri-tjetrit, ndërsa në sfond, populli i Kosovës përpiqet të kuptojë: për çfarë luhet kjo lojë?

Nga ana tjetër, në një tjetër skaj të këtij teatri, qëndrojnë Elisa Spiropali dhe Glauk Konjufca, dy figura që shihen si përfaqësues të “aktores dhe aktorit të dytë” në një tragjedi kombëtare që po luhet si farsë. Elisa, me elokuencën e saj të zakonshme të mbushur me metafora boshe, dhe Glauku, që duket sikur e ka detyrim të buzëqeshë edhe kur dihet se gjithçka këtu është një farsë. Çfarë rëndësie kanë fjalimet e tyre? Përveçse të mbushin hapësirën kohore mes dy fjalimeve kryesore, ato janë thjesht preludi i një komedie të orkestruar.

Fjalimet? Fjalimet nuk kanë rëndësi. Fjalimet janë vegla të kota në këtë lojë të madhe imazherike. Sepse çdo fjalë e thënë aty ka një qëllim të vetëm: të krijojë një iluzion bashkimi që, në realitet, është vetëm një ndihmë e maskuar për një kryeministër të Kosovës në rënie të lirë. Çdo frazë, çdo premtim, çdo referencë historike është një re e mjegullës politike për ta bërë popullin të harrojë për një çast mungesën e rezultateve, dështimet dhe përçarjet që ka krijuar ky kryeministër.

Dhe këtu qëndron ironia më e madhe: ku është dinjiteti i kryeministrit të Shqipërisë? Si mundet Edi Rama, një lider me ambicie globale dhe një imazh të ndërtuar me kujdes në arenën ndërkombëtare, të vijë në Prishtinë dhe t’i dhurojë Albin Kurtit atë që askush tjetër nuk do t’ia jepte – një dhuratë të pakushtëzuar për ta shpëtuar politikisht? Ku është dinjiteti kur ai përdor qeverinë shqiptare dhe Kuvendin e Shqipërisë si një trampolinë për ta kthyer një lider të përçarjes në një simbol të bashkimit, vetëm pak javë para zgjedhjeve?

Më ironike akoma është pozita e opozitës së Kosovës. Nëse refuzojnë të marrin pjesë, do të stigmatizohen si kundërshtarë të unitetit kombëtar. Nëse marrin pjesë, do të duken si kukulla të një skenari të shkruar nga Tirana dhe Prishtina për interesat e një njeriu të vetëm. Dhe kështu, fotografia nesër nuk është një imazh bashkimi, por një kronikë e hipokrizisë së madhe. Një fotografi ku dinjiteti ka rënë poshtë, e bashkë me të edhe shpresa se ky takim do të kishte një qëllim më të madh sesa shpëtimi i një figure politike të konsumuar.

Ky takim i dy qeverive dhe dy kuvendeve që do të mbahet nesër në Prishtinë është një skenë e pastër hipokrizie dhe manipulimi politik. Një farsë e ndërtuar për t’i shërbyer një qëllimi të qartë: shpëtimit të Albin Kurtit nga humnera politike ku e ka zhytur veten përmes qeverisjes së tij katërvjeçare të dështuar dhe thellësisht përçarëse. Ky nuk është një takim mes dy kuvendeve dhe dy qeverive siç pretendohet. Kjo është një tribunë personale për t’i dhënë Kurtit një “shtytje kombëtare” në momentin më të dobët politik të jetës së tij.

Në këtë teatër të koordinuar, ku Elisa Spiropali dhe Glauk Konjufca flasin si bashkëpunëtorë të devotshëm të një qëllimi të njëanshëm, dhe ku Edi Rama paraqitet si dorëdhënësi i madh i shqiptarizmit, thelbi është i qartë: gjithçka është në funksion të forcimit të Albin Kurtit dhe Vetëvendosjes. Është një goditje strategjike kundër opozitës së Kosovës, një grackë për ta vendosur atë në një situatë të pamundur. Nëse marrin pjesë, atëherë legjitimojnë këtë farsë dhe bëhen vegla të një skenari të mirëorkestruar për populizëm. Nëse refuzojnë, atëherë akuzohen si kundërshtarë të marrëdhënieve kombëtare me Shqipërinë. Një skemë dinake dhe e pamoralshme që përqendrohet vetëm në shpëtimin e një lideri të dështuar.

Për çfarë bashkimi flitet në këtë takim kur vetë Albin Kurti ka qenë promotori kryesor i përçarjes mes Kosovës dhe Shqipërisë? Për çfarë shqiptarie flitet kur Kurti ka shpërfillur në mënyrë sistematike kontributin e Tiranës në çështjet kombëtare? Për çfarë marrëdhëniesh të forta flitet kur ai ka sulmuar qeverinë shqiptare dhe ka hedhur akuza të pabaza për vite me radhë? Ky është një moment ku hipokrizia e Albin Kurtit dhe mbështetësve të tij arrin kulmin. Një kryeministër që nuk pranon ta presë Edi Ramën në konakun e tij dhe që shpesh i ka kthyer shpinën Shqipërisë, sot po përpiqet ta përdorë Tiranën si mjet për të shpëtuar imazhin e tij të rrënuar.

Opozita e Kosovës – PDK, LDK dhe AAK – duhet ta kuptojë këtë grackë dhe të veprojë me dinjitet. Marrja pjesë në këtë takim nuk është detyrim kombëtar; është pjesëmarrje në një komedi politike ku opozita ftohet si spektator i pafuqishëm. Në këtë skemë të orkestruar nga Rama dhe Kurti, opozita përballet me një zgjedhje të vështirë, por që ka një zgjidhje të thjeshtë: të qëndrojë larg dhe të denoncojë këtë hipokrizi si një manipulim të ulët në prag të zgjedhjeve.

Për ta mbyllur, duhet të kuptojmë se ky nuk është një takim kombëtar. Ky është një cirk politik. Është një përpjekje e dëshpëruar për ta paraqitur Albin Kurtin si një figurë bashkuese, kur në realitet ai është përçarësi më i madh që ka njohur historia moderne e marrëdhënieve mes Kosovës dhe Shqipërisë. Asnjë fjalim, asnjë foto dhe asnjë manipulim nuk mund të fshehë dështimet e tij. Dhe opozita e Kosovës duhet ta thotë këtë me zë të lartë dhe të qartë. Ky është momenti për të mbrojtur dinjitetin e saj dhe interesin kombëtar të Kosovës, jo për t’u bërë pjesë e një loje të pistë politike.

Një vit i suksesshëm përtej pritshmërive

Sponsoruar