Ambasadori i Shteteve të Bashkuara të Amerikës në Kosovë, Jeffrey Hovenier, ka falenderuar Emisarin e ShBA’së për Ballkanin Perëndimor, Alexander Kasanof, për vizitën dy ditore që zhvilloi në Kosovë.

Hovenier ka publikuar një kolazh me fotografi të takimeve që kanë zhvilluar bashkë me Kasanof këto dy ditë, si me Presidenten Vjosa Osmani, Kryeministrin Albin Kurti, liderët opozitarë e njerëz nga bota e medias, shoqërisë civile dhe biznesit, shkruan Reporteri.net.

“Diskutime të rëndësishme me liderët dhe partnerët në qeveri, media, shoqërinë civile dhe biznesin se si të përmirësohet bashkëpunimi konstruktiv dhe të avancohet trajektorja evropiane e Kosovës, prosperiteti dhe siguria”, ka shkruar Hovenier.

-Advertisement-

Në fund të vizitës, Kasanof ka folur për një grup gazetarësh në Prishtinë, lidhur për këto dy ditë qëndrimi në Kosovë dhe takimet që ka pasur.

“Në takimet e mia me presidenten dhe kryeministrin kam përsëritur dëshirën tonë për një partneritet më efektiv”, tha Kasanof.

“Gjithashtu, jam shprehur i kënaqur me rifillimin e qarkullimit të mallrave [nga Serbia në Kosovë] dhe që Kosova ka arritur të marrë vendin e saj në CEFTA dhe në Procesin e Berlinit”, shtoi zyrtari i lartë amerikan.

Kasanof theksoi, po ashtu, se Shtetet e Bashkuara “mbeten mbështetëse të fuqishme të popullit të Kosovës dhe të vendit demokratik, sovran dhe multietnik”.

“Ne vazhdojmë të mbështesim edhe integrimin euroatlantik të Kosovës, si dhe integrimin në strukturat evropiane, sidomos në kohën kur shohim aq ndryshime në Evropë. Mendojmë se ky vazhdon të jetë vendi i duhur për Kosovën. Kjo është diçka që ne duam ta avancojmë dhe duam të punojmë me Kosovën”, tha Kasanof.

Sipas tij, SHBA-ja pret që Kosova dhe Serbia t’i përmbushin të gjitha angazhimet që kanë marrë përsipër në dialogun për normalizimin e marrëdhënieve, të ndërmjetësuar nga BE-ja, si dhe me marrëveshjet e arritura në kuadër të tij.

Kjo, siç tha ai, përfshin edhe dërgimin e draft-statutit për Asociacionin e komunave me shumicë serbe në Kosovë për vlerësim në Gjykatën Kushtetuese të vendit.

Comodita Home rikthen “Garage Sale” për edicionin e tetë, me zbritje deri në 70%

Sponsoruar

-Advertisement-