Nga 23 deri më 28 shtator zhvillohet në Tiranë Java Kulturore Kineze, e mbështetur nga Ministria e Ekonomisë, Kulturës dhe Inovacionit. Këto veprimtari mbahen në 75-vjetorin e themelimit të Republikës Popullore të Kinës dhe vendosjes së marrëdhënieve diplomatike Shqipëri-Kinë.

Java kulturore nisi me çeljen e ekspozitës “Miqtë, Art dhe Histori”, në Galerinë e Artit në Tiranë, dhe vijoi me Javën e Filmit Kinez, në kinemanë “Cineplex”.

Të pranishëm në ceremoni ishin ambasadorja e Kinës në Shqipëri, Pang Chunxue, zv.ministrja e Ekonomisë, Kulturës dhe Inovacionit, Blerta Rama, kryetari i Shoqatës Kulturore Shqipëri-Kinë, Iljaz Spahiu, përfaqësues të filmit shqiptar, të medies, si dhe dashamirës shqiptarë dhe kinezë të filmit.

Ambasadorja Pang u ndal në 75-vjetorin e vendosjes së marrëdhënieve diplomatike midis Kinës dhe Shqipërisë, duke theksuar se në Javën e Filmit Kinez do të shfaqen 6 prodhime të kinematografisë kineze, me temë sociale dhe kulturore.

Ambasadorja kineze deklaroi se shkëmbimet kulturore të filmit dhe televizionit kino-shqiptar mund të gjurmohen në vitet 1960 dhe 1970. Sipas saj, vitet e fundit në Shqipëri janë transmetuar veprat e filmit dhe televizionit kinez si “Panda kineze”, “Ode e gëzimit” dhe “Pekini simpatik”.

“Ambasada e Kinës në Shqipëri është e gatshme të forcojë bashkëpunimin me të gjitha qarqet shqiptare dhe të zhvillojë më shumë aktivitete kulturore, për të rritur miqësinë dhe mirëkuptimin e ndërsjellë mes dy popujve, si dhe për të promovuar shkëmbime kulturore dypalëshe, për të dhënë më shumë kontribute në ndërtimin e një komuniteti me një të ardhme të përbashkët për njerëzimin”,- deklaroi ambsadorja Pang.

Sinologu Iljaz Spahiu, kryetar i Shoqatës Kulturore Shqipëri-Kinë, i cili ka përkthyer filmat nga gjuha kineze në atë shqipe, shprehu vlerësimet për përvojën e tij të përkthimit duke e cilësuar këtë javë të rëndësishme për shkëmbimin kulturor shqiptaro-kinez.

Në mbrëmjen e parë të Javës së Filmit Kinez u shfaq filmi “Heroi im” i cili u ndoq me interes nga të pranishmit.

Java Kulturore Kineze do të vijojë me një koncert muzikor në Katedralen e Kishës Ortodokse në Tiranë nga artistët e Teatrit Kombëtar të Operës dhe Vallëzimit të Republikës së Kinës, të cilët do të performojnë pjesë nga historia mijëravjeçare e trashëgimisë së tyre muzikore.

Java Kulturore Kineze do të përmbyllet të premten në Pedonalen e Tiranës me “Festën e Shijes Kineze”, ku kryeqytetasit do të mund të shijojnë gatime tradicionale kineze, por dhe punime artizanale, lojëra argëtuese, demonstrime të kaligrafisë kineze, perfomancë instrumentin tradicional kinez Guzheng, etj. (Eda Merepeza)

Shkëlqim Devolli dhe Adriatik Kelmendi e presin ambasadorin amerikan, Jeff Hovenier

Sponsoruar