Lajme

Rohde: Sarrazin vizitoi Kosovën për t’i kërkuar Kurtit të bëjë kompromis për CEFTA-n, s’pati sukses

Autori: Gazeta inFokus 16:50 | 05 September 2024

Ambasadori i Gjermanisë në Kosovë, Jorn Rohde, ka deklaruar se emisari i këtij shteti për rajonin e Ballkanit Perëndimor, Manuel Sarrazin, ka ardhur në Kosovë për ta nxitur kryeministrin Albin Kurti të bëjë kompromis për CEFTA-n.

Megjithatë, Rohde ka vlerësuar se një gjë e tillë s’ka pasur sukses

Përmes një postimi në rrjetin social “X”, Rohde ka shkruar nëse është e nevojshme, shtetet e tjera do të vazhdojnë pa Kosovën në marrëveshjen e BE-së për lehtësimin e këmbimeve tregtare për vendet e rajonit.

-Advertisement-

“Manuel Sarrazin vizitoi Kosovën sërish për të nxitur Albin Kurtin që të bëjë kompromis për CEFTA-n, duke mundësuar liritë kryesore për qytetarët e Kosovës, duke zëvendësuar UNMIK-un me Kosovën në bord – pa sukses. Nëse është e nevojshme, vendet e tjera të Ballkanit Perëndimor do të vazhdojnë pa Kosovën, tani për tani, për të vazhduar me bashkëpunimin rajonal dhe Procesin e Berlinit”, thuhet në postimin e Rohdes.

I dërguari i posaçëm i Gjermanisë për Ballkanin Perëndimor, Manuel Sarrazin, gjatë vizitës javën e kaluar në Prishtinë, ka thënë se vendet e Ballkanit Perëndimor, në veçanti Kosova dhe Serbia, duhet të jenë të gatshme për kompromise dhe koncesione jo të lehta në rrugën e tyre drejt Bashkimit Evropian.

Madje, Sarrazin ka thënë se pas vizitës në Kosovë, do t’i vizitojë vendet e tjera të rajonit për arritjen e rezultateve “konkrete” për njerëzit e Ballkanit Perëndimor dhe se për këtë nevojiten kompromise në prag të Procesit të Berlinit, i cili do të mbahet më 14 tetor në Gjermani.

@ManuelSarrazin visited again to urge @albinkurti to compromise on CEFTA, enabling key freedoms for citizens, replacing UNMIK by on the board – unsuccessfully.
If needed, the other WEB countries will move on w/o for now, to go ahead w/ regional coop + Berlin Process pic.twitter.com/JetbpfRchb

— Ambassador Jörn Rohde (@GermanAmbKOS) September 5, 2024