Lajme

Publikohen pamjet: Vetura që u përdor për grabitjen në Suharekë dërgohet në stacion policor

Autori: Gazeta inFokus 17:30 | 24 November 2023

Policia e Kosovës pas veprimeve hetimore ka gjetur veturën e përdorur nga grupi kriminal në grabitjen e kryer para dy ditëve në një nga argjendaritë më të mëdha në qytetin e Suharekës. Vetura është gjetur në fshatin Jezerc.

Në anën tjetër, mediat lokale në Suharekë kanë publikuar pamje të veturës e cila është dërguar në stacionin policor të Suharekës.

-Advertisement-

Lajmin për gjetjen e veturës për Paparaci.com e kanë konfirmuar edhe nga policia e Kosovës.

“Mund të konfirmojmë se sot, në orët e pasditës pas hetimeve të zhvilluara, në fshatin Jezerc është gjetur vetura e cila dyshohet se ishte përdorur në rastin e grabitjes në Suharekë.”, thotë policia.

Gjithashtu, policia thotë se “Njësitet relevante policore janë duke kryer ekzaminimin e veturës, për të vazhduar me konfiskimin dhe procedurat e mëtejme hetimore.”

Ndryshe, mbrëmjen e së mërkurës ka ndodhur një plaçkitje e armatosur në një argjendari në qytetin e Suharekës. Në tentativën për ta parandaluar plaçkitjen, është plagosur një polic i Kosovës në këmbë.

Nga ky incident përveç një polici të plagosur, ka mbetur edhe një tjetër i lënduar.

Subscribe në YouTube: GAZETA INFOKUSI