Lajme

Gjenden mbetje mortore edhe në Prizren, mund të jenë të viktimave të luftës

Autori: Gazeta inFokus 13:34 | 10 November 2023

Në Tusuz të Prizrenit janë gjetur mbetje mortore të premten e që potencialisht mund të jenë të viktimave të luftës.

Komisioni Qeveritar për Persona të Zhdukur ka njoftuar se gërmimet në këtë lokacion kishin nisur sot në vazhdën e atyre më herët në tri lokacione në hapësirat e varrezave të qytetit të Prizrenit.

“Gërmimet e filluar në mëngjes tanimë kanë rezultuar me gjetje dhe zhvarrosjen e mbetjeve mortore që mund t’iu përkasin viktimave të luftës që vazhdojnë të jenë në Listën e Personave të Zhdukur. Mbetjet mortore të zhvarrosura do të dërgohen në Institutin e Mjekësisë Ligjore për ekzaminimet e nevojshme dhe identifikimin përmes analizës shkencore të ADN-së”, thuhet në njoftimin e komisionit.

-Advertisement-

Gërmimet në Tusuz u kryen në zbatim të urdhëresës së Gjykatës Themelore të Prishtinës, Departamentit Special.

“Lokacioni në Tusuz të Prizrenit është lokacioni i trembëdhjetë i adresuar në kuptim të gërmimit vlerësues gjatë këtij viti brenda territorit të Republikës së Kosovës”, thuhet tutje.

Dje, Komisioni Qeveritar për Persona të Zhdukur ka njoftuar se gjatë gërmimeve që kanë bërë në fshatin Prekaz, në Skenderaj, kanë hasur në mbetje mortore/eshtra, që potencialisht thuhet se mund të jenë të personave të zhdukur.

Ministrja e Drejtësisë, Albulena Haxhiu, më pas njoftoi se në Prekaz të Poshtëm u gjetën mbetjet mortore të tre individëve.

“Ekipet e Institutit të Mjeksësisë Ligjore me mbështetjen e EULEX, KQPZH dhe PK, kanë lokalizuar mbetjet kockore të së paku tre individëve të cilët dyshohet se janë nga lufta e fundit në Kosovë. Mbetjet do të dërgohen në IML për vazhdimin me procedurat e ekzaminimit dhe indentifikimit mjekoligjor.

Subscribe në YouTube: GAZETA INFOKUSI