Lajme

Europol arreston 23 liderë ballkanikë të trafikut të drogës

Autori: Gazeta inFokus 16:57 | 12 May 2023

Europoli ka arritur të kryej një aksion ku tre vende janë përfshirë në shfarosjen e organizatës më të madhe kriminale të trafikut të drogës në rajonin e Ballkanit, duke rezultuar në sekuestrimin e aseteve me vlerë rreth 5 milionë euro dhe arrestimin e ish-udhëheqësit të rrjetit ndërkombëtar të hajdutëve të argjendarisë Pink Panther.

Ekipi i Europolit ka gjurmuar rrjetin kriminal duke hyrë në komunikimet e tyre në Sky ECC, një shërbim i popullarizuar i mesazheve për botën e krimit, i ngjashëm me WhatsApp, shkruan Euronews.

“Më 11 maj, u kryen bastisje të koordinuara në Serbi dhe Holandë, duke synuar si udhëheqjen e kartelit ashtu edhe infrastrukturën e shpërndarje”.

-Advertisement-

“Gjithsej janë arrestuar 23 persona, mes të cilëve tre drejtuesit e kësaj organizate kriminale, të cilësuara si objektiva me vlera të larta nga Europoli”, thuhet në njoftimin e bërë nga Europoli.

Ngarkesat shumëtonëshe të kokainës besohet se janë transportuar nga kjo organizatë kriminale drejtpërdrejt në Evropë nga Kolumbia, Brazili dhe Ekuadori, ose përmes infrastrukturës logjistike të Afrikës Perëndimore.

Në botën e krimit, kjo bandë njihej për dhunën dhe grabitjet e nivelit të lartë.

“Një nga objektivat e arrestuar në Serbi ishte një ish-udhëheqës i grupit famëkeq kriminal Pink Panther”, thuhet në deklaratë.

Pink Panther është një rrjet ndërkombëtar hajdutësh xhevahiresh, grabitjet e të cilit janë përshkruar si disa nga më të guximshmet në historinë e krimit të organizuar.

Përafërsisht 800 anëtarë të këtij grupi besohet të jenë ish-ushtarakë ose figura paraushtarake nga Serbia, Mali i Zi dhe ish-Jugosllavia, të cilët përdorën përvojën e tyre nga luftërat e viteve 1990 për të grabitur bizhuteritë në të gjithë botën.

Sendet e sekuestruara nga policia përfshijnë 15 makina të nivelit të lartë, bizhuteri luksoze dhe ora me një vlerë të vlerësuar prej rreth 2 milionë euro, si dhe gati 3 milionë euro para të gatshme.

Ata konfiskuan gjithashtu një tufë armësh dhe eksplozivësh, duke përfshirë dy pushkë snajper, tre pushkë automatike, armë, silenciatorë, më shumë se një duzinë pako me eksplozivë plastikë dhe detonatorë në distancë dhe disa qindra fishekë municioni.

Subscribe në YouTube: GAZETA INFOKUSI