Lajme

Zelensky propozon samit global për paqe, kërkon të mbahet këtë dimër

Autori: Gazeta inFokus 08:08 | 19 December 2022

Presidenti i Ukrainës Volodymyr Zelensky propozoi të dielën mbajtjen e një Samiti Global për Paqen këtë dimër.

Samiti do të “bashkojë të gjitha kombet rreth kauzës së paqes globale”, tha ai në një video-mesazh.

“Ne i ofruam botës Formulën e Paqes. Absolutisht e drejtë. E kemi ofruar sepse nuk ka kampionë në luftë, nuk mund të ketë barazim. Kështu që unë shpall iniciativën për të mbajtur një Samit Global të Formulës së Paqes këtë dimër”.

-Advertisement-

Duke komentuar turneun “Katar 2022”, Zelensky tha se Kupa e Botës vërtetoi se “vende dhe kombësi të ndryshme mund të vendosin se kush është më i forti në lojën e ndershme”.

“Në fushën e gjelbër të lojës dhe jo në fushën e kuqe të betejës. Kjo është ëndrra e kaq shumë njerëzve, kur lojtarët konkurrojnë, duke i bërë të gjithë të shijojnë paqen”, shtoi ai.

Në fillim të kësaj jave, ministri i Jashtëm ukrainas Dmytro Kuleba tha se Kievi planifikon të mbajë një samit për të zbatuar në një nivel universal propozimin e paqes që Zelensky përshkroi në samitin e G-20 të muajit të kaluar në Indonezi.

Dhjetë kushtet e Zelensky-t të paraqitura në samitin e G-20 përshkruajnë një formulë për paqen, hapi i fundit i së cilës është nënshkrimi i një marrëveshjeje paqeje, dhe gjithashtu prek sigurinë bërthamore, sigurinë e ushqimit dhe energjisë, dhe tërheqjen ushtarake të Rusisë nga Ukraina.

Subscribe në YouTube: GAZETA INFOKUSI