Lajme

Parlamenti Evropian: Negociatat për liberalizmin e vizave mund të nisin në dhjetor

Autori: Gazeta inFokus 14:46 | 02 December 2022

Të mërkurën, ambasadorët e vendeve anëtare të Bashkimit Evropian u pajtuan për t’i dhënë mandatin Këshillit Evropian të negociojë procesin e liberalizimit të vizave për Kosovën me Parlamentin Evropian.

E nga kjo e fundit deklaruan se po bëhen gati për fillimin e negociatave.

Zëdhënësi i Parlamentit Evropian për politika të vizave, Janne Ojamo, në një përgjigje për Klankosova.tv tha se negociatat në mes të Kosovës, Parlamentit Evropian dhe Këshillit ka gjasa të nisin gjatë dhjetorit, por pa dhënë ndonjë datë.

-Advertisement-

“Parlamenti Evropian është në përgatitje të negociatave me Këshillin. Ka gjasa që takimet trilaterale (Parlamenti, Këshilli dhe Komisioni) të zhvillohen në dhjetor dhe do të duhen disa takime për të arritur një marrëveshje. Pasi legjislacioni të jetë finalizuar dhe miratuar nga seanca plenare e PE-së dhe nga Këshilli, marrëveshja aktuale e liberalizimit duhet të negociohet në mënyrë dypalëshe midis vendit të tretë dhe Komisionit Evropian”, tha Ojame për Klankosova.tv.

Sipas këtij vendimi, lëvizja pa viza për personat që janë të pajisur me pasaportë të Kosovës do të jetë e mundur pas hyrjes në fuqi të sistemit evropian të udhëtimit, ETIAS.

Data e mëtuar që ky sistem të aktivizohet është fillimi i muajit nëntor të vitit 2023.

E në rast se do të ketë vonesa për ETIAS, liberalizimi i vizave për Kosovën hyn në fuqi jo më vonë se më 1 janar të vitit 2024.

Parlamenti Evropian para katër vjetëve kishte votuar një rezolutë e cila rekomandonte për heqjen e vizave për Kosovën.

Kjo pasi ishte konstatuar se ishin plotësuar të gjitha kriteret.

“Pas heqjes së vizave për shtetasit e ish-Republikës Jugosllave të Maqedonisë, Malit të Zi dhe Serbisë në vitin 2009 dhe për Shqipërinë dhe Bosnje-Hercegovinën në vitin 2010, Kosova mbeti e izoluar, duke u bërë vetmi vend ballkanik, shtetasve të së cilit u duhej ende viza për të udhëtuar në BE”, thoshte PE.

Subscribe në YouTube: GAZETA INFOKUSI
Super Zbritje në Artmotion
-Advertisement-

Të tjera

Fokusi

lajme