Lajme

Djegia e Qendrës së Regjistrimit në Zubin Potok, Sveçla: Ky ësht akt kriminal me elemente terroriste

Autori: Gazeta inFokus 10:56 | 25 September 2021

Ministri i Punëve të Brendshme, Xhelal Sveçla ka reaguar pas aktit kriminal në Zubin Potok, ku është djegur Qendra e Regjistrimit të Automjeteve, shkruan Gazeta Infokus.

Ai e ka cilësuar këtë veprim si akt me elemennte terroriste.

“Sot ora 01:00 pas mesnate, nga një akt kriminal me elemente terroriste të shkaktuar nga persona të dyshimtë është djegur Qendra e Regjistrimit të Automjeteve e cila gjendet në objektin e komunës në Zubin Potok. Policia e Kosovës ka dalë menjëherë në vendin e ngjarjes dhe së shpejti do të kemi më shumë informata. Po ashtu, është sulmuar edhe Qendra e Regjistrimit Civil në Zveçan ku dyshohet edhe për një mjet shpërthyes”, ka shkruar Sveçla.

-Advertisement-

Këto veprime kriminale, sipas tij, tregojnë më së miri se çfarë do të ndodhte në pikat kufitare në Jarinjë dhe Bërnjak nëse nuk do të kishim praninë e njësive speciale për të garantuar rend dhe siguri.

“Ministria e Punëve të Brendshme me agjencitë e saj angazhohet për rend, siguri dhe sundim të ligjit dhe është garant i vendimeve sovrane të Qeverisë së Republikës së Kosovës dhe përkundër veprimeve të tilla do të vazhdoj me angazhim të plotë në zbatimin e vendimit në tërë territorin e Republikës së Kosovës”, ka shkruar Sveçla.

Ai ka ftuar qytetarët në veri që të respektojnë ligjet dhe të mos dirigjohen apo manipulohen nga ata të cilët mbijetojnë politikisht, apo përfitojnë materialisht, vetëm falë tensioneve./Gazeta Infokus/

Subscribe në YouTube: GAZETA INFOKUSI