Lajme

763 raste për 24 orë, Ministria e Shëndetësisë tregon a do të ketë masa të reja

Autori: Gazeta inFokus 14:03 | 13 July 2022

Vetëm sot në vend pati 763 raste të reja me COVID-19 dhe një të vdekur nga ky virus.

Mirëpo nga Ministria e Shëndetësisë për Infokus kanë deklaruar se ende nuk do të ketë ndryshim të masave.

Ata kanë deklaruar se situata me COVID është duke u përcjellë në baza ditore, megjithatë sipas tyre ndryshimi i masave do të bëhet me rekomandimin e ekspertëve.

“Situata me COVID-19 përcillet ne baza ditore. Te gjithë trupat relevante janë ne gatishmëri dhe reagim ndaj COVID-19 si dhe ne konsultime te vazhdueshme. Ndryshimi eventual i masave do te dal nga rekomandimet e eksperteve.  Masat aktuale ne fuqi rekomandojnë bartjen e maskës ne mjedise te mbyllura dhe krahas kësaj vaksinimin”, kanë thënë nga Ministria.

Vendimi për masa të reja duket të jetë ende i panevojshëm pasi sipas MSH-së edhe pse ka rritje të rasteve nuk ka ngarkesë spitalore.

“Ndonëse numri i rasteve është ne rritje, ne aspektin klinik, ngarkesa spitalore mbetet e ulet dhe sot sipas raporteve zyrtare, ka pasur 39 paciente te shtrire me COVID-19 ne te gjitha spitalet ku trajtohen pacientet me COVID-19”, kanë deklaruar nga MSH-ja për Infokus.

Ata po ashtu kanë bërë thirrje që qytetarët të vaksinohen pasi kjo është masa më efektive për parandalimin e këtij virusi dhe vdekjeve që po vijnë nga COVID-19.

“MSH, u bën thirrje qytetareve qe ta vaksinohen, sepse kjo është masa me efektive për parandalimin e përhapjes se sëmundjes, zhvillimit te formave te renda te saj dhe vdekjeve. Gjithashtu, u rikujton te gjithëve se janë ne fuqi masat e 30 prillit 2022 te cilat sado qe nuk kane shume kufizime, ndihmojnë ne mbajtjen e situatës me te qete ne kuptimin epidemiologjik. Sipas nevojës, Komisioni për vlerësim dhe koordinim lidhur me COVID-19 dhe Komisioni këshillëdhënës mund te takohen dhe ta trajtojnë çdo situate lidhur me COVID-19”, thuhet në përgjigjet e MSH-së.

Derisa në këtë javë janë shënuar 3 vdekje nga COVID-19 ndërsa pati 1 mijë e 48 raste të reja pozitive për vetëm këto tre ditët e fundit./Gazeta Infokus/

Të tjera