Lajme

4 në pranga në Shëngjin me një gomone dhe 30 bidonë benzinë

Autori: Gazeta inFokus 20:25 | 13 August 2017

Policia e Lezhës njoftoi mbrëmjen e së dielës arrestimin e 4 personave dhe sekuestrimin e një gomoneje në Shëngjin të Lezhës. Ishin shërbimet e Drejtorisë Rajonale për Kufirin dhe Migracionin Durrës në bashkëpunim me Delta Force dhe policinë lokale të Lezhës që ushtruan kontroll në vendin e quajtur “Skalierat Veriore” në Shëngjin. Në breg është parë një gomone dhe një automjet tip Alfa Romeo në afërsi të saj.

Policia thotë se menjëherë është ndërhyrë nga efektivet e policisë që kanë bërë bllokimin dhe sekuestrimin e gomones, automjetit Alfa Romeo si dhe të 30 bidonëve të mbushur me benzinë. 2 bidonë ishin në gomone, 12 bidonë ishin në automjet si dhe 16 bidonë ishin në tokë.

Në pranga u vu Eltion Isufaj, 29 vjeç, banues në Vlorë, Nertil Shehu, 26 vjeç, banues në Vlorë të cilit i janë gjetur në xhep 100 dollarë të dyshuar si të falsifikuar. Është arrestuar edhe Eduart Musia, 30 vjeç, banues në Vlorë si dhe Arbër Bregu, 27 vjeç, banues në Tiranë.

-Advertisement-

Dyshohet se gomonia është trafikuar nga Italia për në Shqipëri nga Nertil Shehu, Eduart Musia dhe Eltion Isufaj.