Lajme

300 euro gjobë pasi pranoi se ia mori ish-bashkëshortes veturën të cilën ia kishte dhuruar vetë

Autori: Gazeta inFokus 11:22 | 27 August 2021

Gjilan – Gëzim Uka është dënuar me 300 euro gjobë nga Gjykata Themelore në Gjilan, pasi pranoi se në mënyrë tinëzare mori nga ish-bashkëshortja veturën të cilën ia kishte dhuruar gjatë bashkëjetesës.

Aktgjykimi u shpall të premten nga gjykatësja Snezhana Mijalloviq, pasi Uka pranoi fajësinë në shqyrtimin fillestar që u mbajt paraprakisht, raporton “Betimi për Drejtësi”.

Pas leximit të aktakuzës nga prokurorja Huma Jetishi, i akuzuari u deklarua fajtor dhe tha se nuk e ka ditur se veprimet që kishte bërë ishin të kundërligjshme.Pranimin e fajësisë e ka mbështetur mbrojtësi i të akuzuarit, avokati Skender Musa dhe prokurorja Jetishi, e që më pas e aprovoi edhe gjykatësja Mijalloviq.

Ndryshe, në aktin akuzues të Prokurorisë Themelore në Gjilan thuhet se Gëzim Uka, më 18 gusht 2021, me qëllim të ushtrimit në mënyrë arbitrare të një të drejte që mendon që i takon, merr vet drejtësinë në duar, duke pretenduar që vetura “Golf VII” që ia kishte dhuruar ish-bashkëshortes gjatë bashkëjetesës i takon atij.

Në aktin akuzues thuhet se e dëmtuara e kishte marr veturën kur ishin ndarë, duke pretenduar që është në pronësi të saj. Por, aty thuhet se i akuzuari vazhdimisht kërkon nga e njëjta që t’ia kthejë veturën, por ajo i thotë se çështjen do ta zgjidhnin në gjykatë.

Në këtë mënyrë, sipas aktakuzës, i akuzuari duke dashur ta marrë vetë drejtësinë në duar, në mënyrë tinëzare hyn në oborrin e shtëpisë së të dëmtuarës dhe më çelësin e tij rezervë e merr veturën dhe largohet në Fushë Kosovë.

Për këtë ai thuhet se ka kryer veprën penale “Vetëgjyqësia” nga neni 410, paragrafi 1 lidhur me paragrafin 1 të Kodit Penal të Kosovës, e cila vepër dënohet me gjobë ose me burgim deri në gjashtë (6) muaj.

Të tjera