Lajme

25 vjet nga rënia e dëshmorit Hashim Hajdini, Kurti: Luf toi në mbrojtje të pragut të shtëpisë

Autori: Gazeta inFokus 19:58 | 27 March 2024

Sot janë bërë 25 vjet nga rënia e dëshmorit Hashim Hajdini, për të cilin kryeministri i vendit, Albin Kurti u shpreh se u vra duke rezistuar me armë, teksa luftoi në mbrojtje të pragut të shtëpisë, shkruan Gazeta Infokus.

I pari i ekzekutivit përmes një postimi në “Facebook”, ka rrëfyer në mënyrë kronologjike ngjarjen që nga momenti kur policët serbë e sulmuan shtëpinë e Hashim Hajdinit në Fushë Kosovë si dhe e vranë nënën e tij Gjyle Hajdinin e deri tek vrasja e vet Hashimit.

“Dy ditë pas fillimit të bombardimeve të NATO-s mbi Jugosllavi, mbrëmjen e 26 marsit 1999, policët serbë e sulmuan shtëpinë e Hashim Hajdinit në Fushë Kosovë dhe e vranë nënën e tij Gjyle Hajdinin. Duke e mbrojtur familjen e tij Hashimi u plagos, teksa me një revole arriti t’i vriste dy policë që ia vranë nënën. Atë ditë, dy motrat, gruaja dhe fëmijët e Hashimit ishin larguar nga Fushë Kosova dhe ishin strehuar në Prishtinë. Megjithëse i plagosur në këmbë, Hashimi e kaloi gjithë natën pranë babait të paralizuar dhe trupit të nënës së vrarë”, ka shkruar Kurti.

-Advertisement-

Po ashtu kryeministri rrëfeu edhe ngjarjen se si Hashimi kishte refuzuar të largohej nga shtëpia e tij duke luftar rreth katër orë e në fund u vra në mbrotje të pragut të shtëpisë.

“Mëngjesin e 27 marsit 1999, dy motrat e Hashimit erdhën nga Prishtina në Fushë Kosovë për ta tërhequr Hashimin, babain e tyre dhe nënën e vrarë. Por Hashimi refuzoi të largohej nga shtëpia. Me automatikët që ua kishte marrë dy policëve që i kishte vrarë, ai u barrikadua në shtëpinë e tij, i vendosur të qëndronte. Atë paradite shtëpia e tij u sulmua nga policë të Serbisë, kurse Hashimi rezistoi duke luftuar rreth katër orë, derisa goditjet me artileri e rrënuan tërësisht shtëpinë e tij, duke e vrarë Hashimin dhe babain e tij Hajvazin. Atë natë, policët serbë e vranë edhe gruan dhe djalin e axhës së Hashimit, Zyla Hajdinin dhe Naim Hajdinin. Ai u vra duke rezistuar me armë, teksa luftoi në mbrojtje të pragut të shtëpisë”, thuhet në shkrimin e Kurtit./Gazeta Infokus/

Më poshtë gjeni postimin e tij të plotë:

Subscribe në YouTube: GAZETA INFOKUSI