Lajme

12 milionë euro për mirëmbajtjen e rrugëve gjatë dimrit, sa janë të përgatitura kompanitë e kontraktuara

Autori: Gazeta inFokus 11:51 | 06 December 2021

Departamenti për menaxhimin e rrugëve është i përgatitur për mirëmbajtjen e rrugëve gjatë këtij sezonit të dimrit, shkruan Gazeta Infokus.

Në një prononcim për Gazetën Infokus, zyrtarët e Ministrisë së Infrastrukturës, thanë se buxheti i paraparë lidhur me mirëmbajtjen e rrugëve për sezonin e sivjetshëm dimëror është 12 milionë euro.

“Mirëmbajtja e rrugëve është e përfshirë në një pako njëvjeçare e titulluar si: ‘Mirëmbajtja Verore dhe Dimërore (MVD) e Rrugëve’. Nga kjo buxheti i paraparë lidhur me mirëmbajtjen e rrugëve për sezonin e sivjetshëm dimëror është 12 milionë euro”, thanë nga kjo ministri.

-Advertisement-

Tutje nga Drejtoria e Rrugëve të Kosovës thanë se kompanitë e kontraktuara janë furnizuar me kripë dhe repromateriale të tjera të nevojshëm.

“Kompanitë e kontraktuara nga ana e Ministrisë së Mjedisit, Planifikimit Hapësinor dhe Infrastrukturës janë të furnizuara me kripë sipas kontratave si dhe pajisjet për pastrimin e borës”, thanë nga kjo ministri.

Nga Drejtoria e Rrugëve të Kosovës shtuan se për mirëmbajtjen dimërore të rrugëve janë të kontraktuara deri me tani 17 kompani.

“Numri i kompanive të angazhuara nga Ministri e Mjedisit, Planifikimit Hapësinor dhe Infrastrukturës për mirëmbajtjen dimërore të Autorrugëve, rrugëve Nacionale dhe atyre Rajonale deri me tani është gjithsej 17 kompani” than nga kjo ministri për Infokus.

Sipas zyrtarëve të MMPHI-së, mirëmbajtja e rrugëve të Kosovës parashihet për të dy sezonet, për atë verore dhe dimërore. Sezoni dimëror fillon me 15 nëntor dhe mbaron me 1 prill, ndërkaq qe nga 1 prilli deri me 15 nëntor fillon sezoni veror i mirëmbajtjes rrugore./Gazeta Infokus/

Subscribe në YouTube: GAZETA INFOKUSI